10 ֆիլմ, որոնք դիտելուց հետո ուզում ես ապրել ու վայելել կյանքը

Կա ֆիլմերի մի յուրահատուկ տեսակ: Դրանք ասես թթվածին լինեն, քանի որ դիտելուց հետո ուզում ես ապրել, վայելել կյանքի ամեն րոպեն, դառնալ ավելի ու ավելի լավը:

Հ․Գ․ Ներկայացված ֆիլմերը դասավորված են պատահականության սկզբունքով

1. Փոքրիկ միսս երջանկությունը / Маленькая мисс Счастье
Թերևս լավագույն ֆիլմը այն մասին, որ կարևորը ոչ թե հաղթանակն է, այլ մասնակցությունը: Որովհետև եթե դուք էլ, ինչպես այս ֆիլմի փոքրիկ հերոսուհին, որոշել եք դառնալ «փոքրիկ միսս Երջանկություն», բայց ձեր ընտանիքը կազմված է անհաջողակ հայրիկից, բռնկուն մայրիկից, համասեռամոլ հորեղբորից, լռության երդում տված եղբորից և թմրամոլ պապիկից, և նրանք բոլորը պատրաստվում են ձեզ օգնել այդ հարցում, ապա ձեզ ոչինչ չի մնում, քան պարզապես հաճույք ստանալ մասնակցությունից:
2. 7 կյանք / Семь жизней
Բեն Թոմասը չի կարողանում ուշքի գալ ավտովթարից հետո, որը իր անզգուշության պատճառով խլել է 7 մարդու, այդ թվում և իր հարսնացուի կյանքը: Մեղքի զգացումից տանջվելով՝ նա որոշում է ուղղել անցյալի իր սխալը: Նվիրաբերելով իր կենսական օրգանները մահացու հիվանդ մարդկանց՝ նա օգնում է նրանց ապրել, նոր կյանք է տալիս նրանց՝ փորձելով լրացնել այն կյանքերը, որոնք այլևս չկան իր մեղքով: Ամեն ինչ ավելի է բարդանում, երբ Բենն անսապսելիորեն սիրահարվում է հերթական անծանոթին՝ Էմիլիին, ում կյանքը պատրաստվում էր փրկել:
3. Ես քեզ, դու՝ ուրիշին / Заплати другому
Թրևոր անունով 7-րդ դասարանցի այս տղան հորինել է աշխարհը փոխելու սեփական տեսությունը, որի էությունը չափազանց պարզ է. ես կօգնեմ քեզ, իսկ դու կօգնես 3 ուրիշ մարդու, իսկ հետո այդ երեքն էլ կշարունակեն նույն շղթան ու կտարածեն բարություն ու ջերմություն ամբողջ աշխարհում: Արդյո՞ք կգործի այս մեխանիզմը: Հավատացողները շատ քիչ են, բայց Թրևորը որոշում է փորձել դա՝ սկսելով բարի գործերի այդ շղթան:
4. Բենջամին բաթթոնի խորհրդավոր պատմությունը / Загадочная история Бенджамина Баттона
Այս ֆիլմը շատ նման է ամենայն մանրակրկտությամբ գրված գրքի: Ֆիլմի վրա կատարված հսկայական աշխատանքի արդյունքն ակնհայտ է՝ դերասանական գերազանց խաղ, անկրկնելի մթնոլորտ, ֆանտաստիկ իրադարձությունների գերհավաստի ներկայացում: Այս ֆիլմը կարող է ձեզ դուր գալ, կարող է և դուր չգալ, բայց այն դիտելուց հետո դուք միանշանակ չեք լինի առաջվանը:
5. Երազանքների ցանկը / Пока не сыграл в ящик
Հրաշալի մի ֆիլմ հրաշալի դերասանների՝ Ջեք Նիքոլսոնի և Մորգան Ֆրիմանի մասնակցությամբ: Երկուսի հերոսներն էլ մահացու հիվանդ են և ընդամենը 1 տարվա կյանք ունեն: Միավորելով իրենց չիրականացած ցանկությունների ցուցակները՝ նրանք որոշում են ի կատար ածել դրանք, շրջագայել ամբողջ աշխարհով, հասցնել այն ամենը, ինչ չեն արել ողջ կյանքի ընթացքում և ուղղել հին սխալները: Այդ ֆիլմում չկա ոչ մի ավելորդ կադր կամ խոսակցություն, ֆիլմի յուրաքանչյուր րոպեն լցված է չափազանց հետաքրքիր սյուժեով և հզոր զգացմունքներով: Հերոսների յուրաքանչյուր խոսակցություն ի վերջո հանգեցնում է այն մտքին, որ ապրել պետք է ոչ թե վաղը, 1 շաբաթից, այլ հիմա:
6. Ավգուստ ռաշ / Август Раш
Սա շատ գեղեցիկ մի պատմություն է՝ հագեցած հեքիաթային էլեմենտներով, և դիտվում է մի շնչով: Որպեսզի թույլ տաք այս գեղարվեստական կինոնկարին թափանցել ձեր հոգու խորքը, խնդրեք ձեր ներքին քննադատին լռել ու աչք փակել սյուժեի ոչ իրատեսական հատվածների վրա, և փոխարենը վայելեք ֆիլմի հուզիչ սյուժեն և գեղեցիկ երաժշտությունը, որովհետև հենց վերջինս է, ըստ էության, ֆիլմի ամենակարևոր դերակատարը:
7. Իսկ հոգու խորքում ես պարում եմ / А в душе я танцую
Ֆիլմի հերոսները հաշմանդամություն ունեցող ու անվասայլակով տեղաշարժվող տղաներ են: Բայց նրանց լավատեսությունը շատ ավելի մեծ է, քան մնացած բոլոր մարդկանցը՝ միասին վերցրած: Անգամ ֆիզիկական սահմանափակ հնարավորություններով՝ նրանք չեն ընկճվում և փորձում են ապրել լիարժեք կյանքով՝ ուրախանում են, հիմարություններ են անում, պաշտպանում են թույլերին, պարում են ու կատակում:
8. Միշտ ասա «այո» / Всегда говори «да»
Միջինվիճակագրական մի մենեջեր՝ Կարլ Ալենը, խոր դեպրեսիայի մեջ է գտնվում: Որպեսզի կարողանա հաղթահարել այն, նա որոշում է կայացնում ամեն ինչի ասել «այո» և համաձայնել ամեն նոր առաջարկի: Այդպես նրա կյանքը վերածվում է զարմանալի մի արկածաշարի, որի մեջ հայտնվել մեզ նույնպես չէր խանգարի:
9. Թակելով դրախտի դռները / Достучаться до небес
Երկու մահացու հիվանդ ընկերների պատմությունն է այս ֆիլմը: Եթե կարդանք ֆիլմի սյուժեն, ապա կթվա, թե այս ֆիլմը պարզապես կրիմինալ մի պատմություն է: Իմանալով իրենց հիվանդության մասին՝ ֆիլմի հերոսները մեքենա են գողանում, որի թափքում պահված էր 1 միլիոն գերմանական մարկ: Նրանց սկսում են հետապնդել վարձու մարդասպանները, ոստիկանությունը, սակայն այս տղաները, ովքեր դարձել էին ակամա գողեր, փնտրում էին բոլորովին այլ բան: Ֆիլմը նկարահանված է այնքան հրաշալի ձևով, դերասանների խաղը այնքան տպավորիչ է, որ ֆիլմի ավարտից հետո սկսում ես իսկապես գնահատել կյանքիդ ամեն վայրկյանը: Եվ անպայման ուզում ես ծով գնալ:
10. Վայրի պայմաններում / В диких условиях
Քոլեջն ավարտելուց հետո ամենախոստումնալից ուսանողներից ու մարզիկներից մեկը՝ Քրիստոֆեր Մաքքենդելսը, թողնում է իր ողջ ունեցվածքը, ուսման ընթացքում կուտակած 24 հազար դոլարը փոխանցում բարեգործական ֆոնդին և ավտոստոպով ուղևորվում է Ալյասկա՝ վայրի բնության գիրկ: Ճանապարհին նա ծանոթանում է մեկը մյուսից տարբեր մարդկանց հետ, ովքեր այս կամ այն կերպ ազդում են իր կյանքի վրա: Ֆիլմը հնարավորություն է տալիս գոնե առժամանակ կտրվել անկարևոր խնդիրներից և միաձուլվել բնությանը: Այն իսկապես շատ լավն է ստացվել՝ շնորհիվ Շոն Փենի փայլուն ռեժիսորական աշխատանքի և դերասանական կազմի հրաշալի խաղի:
  • Սմայլներ և մարդիք
    Կենդանիներ և բնություն
    Ուտեկիք և խմելիք
    Գործունեություն
    Ճանապարհորդություն և վայրեր
    Նյութեր
    Սիմվոլներ
    Դրոշակներ