Բոհեմական ռապսոդիա

Սյուժեն ընդգրկում է 1970-1985 թվականների իրադարձությունները՝ պատմելով Queen խմբի ստեղծագործական կյանքի և խմբի անդամների հարաբերությունների մասին։ 1970 թվականին Ֆարուխ Բուլսարան, որն այդ ժամանակ ուսանող էր և բեռնակիր էր աշխատում օդանավակայանում, մասնակցում է Smile խմբի համերգին։ Շոուից հետո նա հանդիպում է խմբի անդամների հետ, որոնք նրան հրավիրում են խմբի կազմ՝ որպես վոկալիստ։ Վերջինս խմբին տալիս է «Queen» անվանումը, և նրանք սկսում են հյուրախաղերով հանդես գալ Մեծ Բրիտանիայում։ Ֆարուխը վերցնում է Ֆրեդի Մերկուրի բեմական կեղծանունը։ Դեբյուտային ալբոմի ձայնագրման համար խումբը ստիպված է լինում վաճառել համերգային ֆուրգոնը։ Ֆիլմը պատմում է նաև երգչի անձնական կյանքի մասին։ Ֆրեդին սկսում է հանդիպել Մերի Օսթինի հետ։ 1975 թվականին Քուինը հասնում է հաջողության և հյուրախաղերով հանդես գալիս օվկիանոսից այն կողմ։ Նոր ալբոմը՝ «A Night at the Opera», ստեղծելիս ձայնագրող ընկերության ներկայացուցիչները մերժում են որպես սինգլ թողարկել 6 րոպե տևողությամբ Bohemian Rhapsody կոմպոզիցիան։ Երաժիշտները ջանասիրաբար աշխատել էին դրա ձայնագրման վրա՝ հավելելով անսովոր հնչունավորում և հարմոնիա։ Արդյունքում կոմպոզիցիան սկզբում հնչում է ռադիոյով, ապա խմբին արժանացնում համաշխարհային ճանաչման։ Ֆրեդին նկատում է իր մեջ հոմոսեքսուալության նշաններ։ Նրա և մենեջեր Փոլ Փրենթերի միջև սիրավեպ է սկսվում, և նա խզում է հարաբերությունները Մերիի հետ։