Բրայթոն Բիչում ապրում է վաղուց այրիացած մի կին՝ Սառա Գոլդֆարբը։ Նրա ամենասիրելի զբաղմունքը հեռուստացույց դիտելն է։ Նա շարունակ դիտում է հեռուստացույց, մասնավորապես Թեփփի Թիբոնսի գովազդային հոլովակները։ Մի օր նա զանգ է ստանում. Նրան հրավիրում են մասնակցելու իր ամենասիրելի հոլովակին։ Կինը այնքան է ոգևորվում, այնքան է ուրախանում։ Չէ՞ որ իրականանում է իր երազանքը՝ հայտնվել մեծ էկրանին։ Նա սկսում է պատրաստվել։ Երբ ձեռքն է ընկնում որդու՝ Հարիի ավարտական երեկոյի նկարը, նա տեսնում է, թե որքան երիտասարդ ու խնամված էր այդ տարիներին։ Եվ որոշում է ջանք չխնայել՝ երիտասարդ Սառայի ողջ գրավչությունն ու հմայքը փոքր-ինչ վերականգնելու համար։ Նա ներկում է մազերը։ Որպեսզի կարողանա նորից կրել այն կարմիր զգեստը, որը կրում էր որդու ավարտական երեկոյի լուսանկարում, նա անցնում է դիետայի։ Իր նպատակին ավելի շուտ հասնելու համար նա ընդունում է իր ընկերուհու խորհուրդը և ընդունում մի շարք նիհարեցնող դեղեր ողջ օրը, իսկ գիշերն էլ հանգստացնող հաբեր է խմում։ Որդին՝ Հարրին, զգուշացնում է Սառային այդ դեղերից կախվածության և առողջության հնարավոր վնասման մասին, բայց Սառան կտրուկ մերժում է որդուն և ասում, որ իր երազանքն իրականանում է. մեծ էկրանին հայտնվելու հնարավորությունը իրեն ապրելու նոր իմաստ է տվել։ Օրեցօր նա ավելի է շատացնում դեղերի ընդունման չափաբաժինը՝ 2-ից 3, 3-ից՝ 4…. Արդյունքում Սառայի մոտ սկսվում են հալյուցինացիաներ։ Սրանց մասին Սառան պատմում է իր բժշկին։ Վերջինս նոր դեղահաբեր է նշանակում։ Սակայն Սառայի տեսիլքներն ու հալյուցինացիաները ավելի ուժեղ ու նյարդային են դառնում, նա աստիճանաբար կորցնում է կապը իրականության հետ։ Սառայի վիճակը գնալով ավելի է վատթարանում։ Նրա երևակայությունը իրեն տանում է դեպի իր սիրելի շոու, նա պատկերացնում է իրեն՝ հսկայական լսարանի առջև կանգնած։ Այս ողջ ընթացքում նա անհամբեր սպասում է իր սիրելի հեռուստաշոուից նամակի, որով պիտի նրան հայտնեին նկարահանման օրը։ Բայց նամակը չկար…