Պիեսի գործողությունները տեղափոխվել են մեր ժամանակներ, «զուգահեռ» ենթադրական Անգլիա, որտեղ ռազմական դիկտատոր Լիր արքան որոշում է հեռանալ հանգստանալու և իր պետությունը բաժանել երեք դուստրերի միջև։ Արքան ցանկանում է իմանալ, թե ինչքան են սիրում իրեն աղջիկները, որպեսզի հասկանա, թե ում թագավորության որ մասը տա։ Սակայն կրտսեր դուստրը հրաժարվում է շողոքորթել հորը, ինչից հետո վերջինս նրան ամուսնացնում է Ֆրանսիայի թագավորի հետ՝ առանց օժիտ տալու, և իր բոլոր ուղեկցորդների հետ տեղափոխվում ավագ դստեր տուն։ Ժառանգությունն ստանալուց հետո Գոներիլն ու Ռեգանը հրաժարվում են ընդունել իրենց հորն իրենց տներում, և արքան հայտնվում է փողոցում։

Թագավորի մերձավորներից մեկը՝ կոմս Գլոստերը, իր կրտսեր՝ ապօրինածին Էդմոնդ որդուց իմանում է, որ ավագ որդին՝ Էդգարը, ծրագրել է սպանել նրան և ստանալ նրա տիտղոսն ու փողերը։ Նա չգիտի, որ դա իշխանությունը գրավել ցանկացող Էդմոնդի խորամանկ ծրագրի մի մասն է։ Էդգարն ստիպված է փախչել հայրենի տնից և ձևանալ խելագար։

Կորդելիան՝ թագավորի կրտսեր դուստրը, իմանում է հոր փախստարակն վիճակի մասին և իր ամուսնու զորքերի օգնությամբ փորձում է նրան վերականգնել գահին։ Գոներիլն ու Ռեգանը պաշտպանում են Էդմոնդին, որը խաբեության միջոցով տիրացել էր հոր ունեցվածքին։ Երեք քույրերի հակամարտությունը վերածվում է մեծամասշտաբ զինված գործողությունների։