Կոլումբուս անունով մի երիտասարդ ճանապարհորդում է Ամերիկայում, որը բռնկված է զոմբի վիրուսի համաճարակով։ Կոլումբուսը համաճարակի սկզբից սկսել է գրել կանոնների ցանկ, որոնցով գոյատևում էր նախկին ԱՄՆ-ում, որն այժմ կոչվում է Զոմբիլենդ։ Ֆիլմի առաջին տեսարաններում Կոլումբուսն ավտոմեքենայով գնում է լցակայան, որտեղ ենթարկվում է մեռելների հարձակմանը։ Նրանցից փրկվելու նպատակով գլխավոր հերոսը դիմում է իր ցանկի առաջին կանոնին․ «Եղի՛ր լավ մարզավիճակում», և փախչում է զոմբիներից։

Հաջորդ օրը Կոլումբուսը քայլելով հեռանում է քաղաքից և հանդիպում մի ուրիշ գոյատևողի՝ Թալահասիին, ում մոտ կա ավտոմեքենա և շատ զենք։ Նա առաջարկում է տղային հասցնել մինչև հարազատ քաղաքը՝ Օհայո նահանգ։ Ճանապարհին նրանք կանգնում են խրամառուն ընկած բեռնատարի մոտ՝ «Hostess» գրառմամբ։ Թալահասին ասում է, որ դեմ չէ ուտել այդ ընկերության արտադրած թխվածքաբլիթները, սակայն պարզվում է, որ բեռնատարում ուրիշ թխվածքաբլիթներ են։ Դա շատ է բարկացնում Թալահասիին։ Այդ քաղցրավենիքների համար նրանք կանգ են առնում սուպերմարկետի մոտ, որտեղ հանդիպում են երկու քույրերի՝ Ուիչիտոյին և Լիթլ-Ռոքին։ Աղջիկները խաբեությամբ նրանցից խլում են ավտոմեքենան, որպեսզի գնան «Վայրի արկածներ» կոչվող զվարճանքների պուրակ, որտեղ, ըստ ասեկոսեների, մինչ օրս զոմբիներ չկան։