Կատաղած վիշապ Սմոգը թռչում է դեպի Էսգարոթ՝ ազատելով լեռը, սակայն քաղաքն ավերելու նպատակով։ Աղեղնավոր Բարդին հաջողվում է հորից ժառանգված հատուկ նետով սպանել Սմոգին, սակայն քաղաքն ամբողջությամբ ավերվում է։ Հերոսը դառնում է Էսգարոթի ղեկավարը և վիրավոր ու վախեցած մարդկանց ուղարկում է Դեյլ, իսկ ինքն ուղևորվում է Միայնակ լեռան մոտ՝ Թորինից ստանալու խոստացված հարստությունը։ Սակայն հասնելով այնտեղ՝ Բիլբոն պատմում է, որ Թորինը տառապում է իր պապիկի հիվանդությամբ և իրեն արդեն արքա է զգում։

Այդ ժամանակ Ազոգը մեծ զորքով մոտենում է Միայնակ լեռանը։ Թրանդուիլի զորքերը միավորվում են Բարդի մարդկանց հետ և գնում այնտեղ՝ ստանալու իրենց գանձերը։ Բարդը փորձում է համաձայնության գալ Թորինի հետ, սակայն նա անճանաչելի էր դարձել և ոչ ոքի չէր ուզում լսել։ Էլֆերը և մարդիկ որոշում են առավոտյան հարձակվել և գրավել Լեռը։ Բոլորը մարտի են պատրաստվում։

Գենդալֆը հասնում է Լեռան մոտ և Թրանդուիլին պատմում է մոտեցող օրկերի զորքի մասին։ Հանկարծ հայտնվում է Բիլբոն և Թրանդուիլի ու Բարդին է հանձնում Արկենսթոնը: Առավոտյան Բարդն առաջարկում է Թորինին քարը փոխել իրենց ոսկիների հետ, սակայն Թորինը չի համաձայնվում և բարկությունից քիչ է մնում սպանի Բիլբոյին։ Հոբիթը կարողանում է փախչել, իսկ հեռվից դեպի լեռն են գալիս թզուկների մեծ բանակ Երկաթյա բլուրներից: Սկսվում է էլֆերի և թզուկների մարտը, բայց Լեռան մոտ են հասնում նաև օրկերը։ Թզուկները սկսում են կռվել նրանց դեմ, և էլֆերը միանում են նրանց։ Սկսվում է մեծ ճակատամարտը, որտեղ հաղթում են դաշնակիցները, սակայն զոհվում են Թորինը, Ֆիլին և Կիլին: