Euphoria. «սիրտը տեղից հանող» հեռուստասերիալ, որն անհարմար է դիտել

Հոսքային կայքերում, ինչպիսին են Netflix-ը և Hulu-ն, դեռահասների մասին դրամաների վերաբերյալ շատ կլիշեներ կան: «Euphoria»-ն նման չէ ոչ մեկին. այն սովորական կլիշե չէ, շոշափում է թեմաներ, որոնք շատ ժամանակակից կինոնկարներ բացառում են: 

«Euphoria»-ն, անկասկած, ծանր շոու է։ Ավագ դպրոցի դեռահասներն առնչվում են աբյուզիվ հարաբերությունների, թմրամոլության, հոգեկան առողջության, թունավոր վարքագծի և սեքսուալության մութ կողմին: Չկա մի դրվագ, որ ֆիլմը դիտելիս քեզ անհարմար չզգաս. անջատում ես համակարգիչը, նորից միացնում, փորձում կրկին: 

Բայց արդյո՞ք պոտենցիալ բացասական հետևանքները չեն ազդի դպրոցական տարիքի երեխաների վրա, որոնք այսօր բախվում են հոգեկան առողջության աննախադեպ ռիսկերի և մարտահրավերների:

Կիսելով դպրոցական երեխաներ ունեցող ծնողների մտահոգությունը՝ այնուամենայնիվ պետք է շեշտել, որ «Euphoria»-ն և նմանատիպ հեռուստասերիալները կենսական անհրաժեշտություն ունեն.

Նրանք մեզ սովորեցնում են ԿԱՐԵԿՑԵԼ. չէ՞ որ մեզ շրջապատող աշխարհը կատարյալ չէ:


Դերասանական կազմը...


«Euphoria»-ն ներկայացնում է բազմազան դերասանական կազմ. այս բազմամշակութային կազմը հիանալի հնարավորություն է նրանց համար, ովքեր հաճախ չեն ունենում հանրային ձայնի իրավունք: Հանթեր Շաֆեր անունով տրանսգենդեր դերասանուհին իր բեկումնային դերով հարթակ է տրամադրել նրանց համար, ովքեր խոսելու կարիք ունեն:

Բարբի Ֆերեյրա, Սիդնեյ Սվինի, Ալեքսա Դեմի և Մոդ Ապաթոու... այս երիտասարդ տաղանդները դեռ կհիշեցնեն իրենց մասին:


Զենդայան...  

Իր նրբագեղությամբ, ոճով, կոպիտ ու ազդեցիկ տեսարաններով Զենդայան հուզել է հեռուստադիտողին: Disney-ի նախկին աստղը մեծահասակների շոուում իր ոչ ավանդական դերով կատարյալ է:

«Մեր շոուն ամենևին էլ բարոյական հեքիաթ չէ՝ մարդկանց սովորեցնելու, թե ինչպես ապրել իրենց կյանքը» - Entertainment Weekly-ին ասել է Զենդայան: «Մենք հույս ունենք օգնել մարդկանց իրենց փորձառության և ցավի մեջ մի փոքր ավելի քիչ միայնակ զգալ, որպեսզի նրանք զգան, որ միայնակ ու միակը չեն, որ ապրում կամ առնչվում են այն ամենի հետ, ինչի հետ գործ ունեն»:


Կինեմատոգրաֆիան...

«Euphoria»-ի օպերատոր Մարսել Ռևը փայլուն օպերատորական աշխատանք է կատարել՝  նկարահանելով սիրտը տեղից հանող տեսարաններ: Դեղորայքի ազդեցության տակ գտնվող երիտասարդների «ճանապարհորդությունները» երբեք այսքան անթերի, բայց պարադոքսալ կերպով բացարձակապես անկատար տեսք չեն ունեցել: Յուրաքանչյուր կադրն արտացոլում է հերոսի զգացմունքներն ու պատմությունն իր ամբողջ խորությամբ: Շոուի լուսավորությունն այնքան հիասքանչ է, որ մի պահ մոռանում ես, որ դիտում ես շոու, այլ ոչ թե Թրևիս Սքոթի երաժշտական տեսահոլովակներից: 

Հունգարացի կինեմատոգրաֆիստն ասում է, որ իրականության վրա հիմնված ստեղծագործությունը և լուսավորության, շրջանակի, ծխի և այլնի շուրջ տարբեր տեխնոլոգիաներ կարևոր դեր են խաղացել էկրանին տրամադրությունը կենդանացնելու համար:

«Մենք կարող ենք մեզ թույլ տալ ամեն ինչ հերոսների էմոցիոնալ տիրույթում» - Մարսել Ռև:


Սաունդթրեքը... 

«Euphoria»-ի սաունդթրեքը սպանիչ է: Խնջույքի տեսարաններն ուղեկցվում են ուժեղացված երաժշտությամբ, որը ստիպում է վեր կենալ և պարել խելահեղորեն, իսկ տխուր տեսարանները ստիպում են կուչ գալ ու հուզվել: 


Շոուն ընդգծում է հոգեկան առողջության խնդիրները

Ֆիլմն առաջին պլան է մղում երիտասարդների շրջանում հոգեկան առողջության խնդիրների, թմրամիջոցների չարաշահման և կախվածության վերաբերյալ կարևոր խոսակցությունները: Սեմ Լևինսոնն ասել է, որ հույս ունի՝ շոուն կհանգեցնի ծնողների և նրանց երեխաների միջև մտերմիկ զրույցների.

«Հուսով եմ, որ դա առնվազն երկխոսություն կբացի երկուսի (ծնողների և երեխաների) միջև, քանի որ դժվար է դեռահաս լինելը: Դժվար է, հատկապես, եթե դուք պայքարում եք կախվածության դեմ»:

Հոգեկան առողջության խնդիրները ռոմանտիկացված չեն. Հեռուստաշոուն ավելի շուտ պատկերացում է տալիս հոգեկան հիվանդության դեմ առօրյա պայքարի և թմրամիջոցների և այլ արատների օգտագործման մասին՝ որպես հաղթահարման մեխանիզմ:


Եվ, վերջապես... այն իրական է

Սերիալը պատուհան է դեպի երիտասարդ լինելու անհանգստությունն ու հարաբերությունների անապահովությունը և անորոշությունը: «Euphoria»-ն սեքսի և թմրանյութերի իր կոպիտ պատկերներով անամոթաբար կոտրում է այն կարծրատիպերը, որոնք մենք նորմալ ենք համարում: Չկա ոչ մի սահմանափակում և դա, հավանաբար, այն է, ինչ մեզ դուր է գալիս ամենից շատ: 

1. Էյֆորիա / Euphoria (2019)
17-ամյա Ռյու Բենեթը վերադառնում է տուն վերականգնողական կլինիկայում բուժումից հետո: Ժամանակ չվատնելով՝ նա կրկին ձեռք է բերում հին սովորություններ՝ թմրանյութեր և խնջույքներ: Սակայն Ժյուլիի հայտնվելը քաղաքում Ռուի համար հույսի նշան է դառնում։