«Դերասաններ Ռոբերտ Փաթինսոնն ու Մարգարեթ Քուոլին կնկարահանվեն ֆրանսիացի ռեժիսոր և սցենարիստ Քլեր Դենիի գալիք՝ «Կեսօրվա աստղերը» ֆիլմում, -գրում է Variety-ն։ Փաթինսոնն արդեն աշխատել է ռեժիսորի հետ «Բարձրաշխարհիկ կյանք» գիտաֆանtաստիկ ֆիլմի շրջանակներում։

Գալիք ֆիլմի սցենարը գրելու է անձամբ Դենին՝ Լեա Միսիուսի և Էնդրյու Լիտվակի հետ համատեղ, այն հիմնված է լինելու Դենիս Ջոնսոնի համանուն վեպի վրա, որը լույս է տեսել 1986 թվականին։ Պատմության կիզակետում է 1984 թվականի Նիկարագուայի հեղափոխությունը. Քուոլին մարմնավորելու է ամերիկացի լրագրողի, ով ռազմական կոնֆլիկտի պատճառով հայտնվում է ճաղերի ետում։ Փաթինսոնի հերոսը անգլիացի նավթային մագնատ է. երիտասարդները հանդիպում են, սիրահարվում միմյանց և փորձում միասին փախչել Կոստա Ռիկա։

Ամբողջական դերասանական կազմը հայտարարվելու է ավելի ուշ, իսկ ֆիլմի պրեմիերան նախատեսված է 2021 թվականին։

Քլեր Դենին ժամանակակից ֆրանսիական հեղինակային կինեմատոգրաֆի կարևորագույն ներկայացուցիչներից է, մինչ սեփական ռեժիսորական կարիերան սկսելը՝ աշխատել է իբրև ասիստենտ-օգնական Վիմ Վենդերսի, Ջիմ Ջարմուշի, Ժակ Ռիվետի և այլ հռչակավոր ռեժիսորների մոտ։ 2010 թվականին այցելել է Հայաստան «Ոսկե ծիրան» Երևանի միջազգային կինոփառատոնի շրջանակներում։ Վերոհիշյալ՝ «Բարձրաշխարհիկ կյանք» ֆիլմը 2019 թվականի հուլիսին ցուցադրվել է նույն կինոփառատոնի «Ծուռ ծիրան» գիշերային ծրագրի շրջանակներում։